STIZZI
( Farsetta fra due innamorati)
Cola - Cummari Cuncetta, chi siti di puntata?
Cuncetta - Sugnu di passaggiu, ma a Vui non v'importa
Cola- Oh! chi siti muzzicata sta matina?
Cuncetta- Oh, chi siti ‘npaccidderi e ‘npertinenti. Non sunnu affari Vostri. Tacchiati!
Cola- Viditi chi siti muzzicata a qualche banna e pi ‘vvi tuccari ci voli na longa canna
Cuncetta- Ma cu mi puttò sta matina ‘ntà sta chiazza chi appi a scuntrari a vui, brutta facciazza!
Cola- Picchì a vostra è megghiu, comu na fata, tutta china di stuccu e ‘ntunacata!
Lavativi ‘ssà facci mentri ch'è ora, allura poi ‘cci voli na rattalora!
Cuncetta- Ffù cosa tinta e tostu ‘nbiscaloru, a me facci pi vui è comu l'oru!
un specchiu è, e vi putiti spicchiariari tutti li vostri bruttizzi cintinari!
Cola- A raggia è chi vi fa parrari e tuttu stu vilenu chi vi fa ittari!
Vui siti comu un picciuni ‘ntà la jaggia o canta pi ‘nvidia o canta pi raggia!
Cuncetta- Ffù malanova quantu siti stortu e notti e jornu mi faciti u cascamortu!
Non mi pozzu moviri d'intra mancu un passu chi avanti a porta trovu a stu satanassu!
Cola- Jò sugnu stortu, ma vui non vi viditi chi cosi boni ‘ncoddu non daviti!
siti orba, storta e malafatta, na jamba ‘cchiù longa e l'autra ‘cchiù curta!
Cuncetta- Vui, siti sgangalatu e menzu imbirutu e ferru vecchiu pi tri quarti ruggiatu!
Vaddativi ‘ntò specchi una bona vota e v'accurgiti chi siti bruttu ‘cchiù da mananova!
Cola- Ma cummari Cuncetta, diciti a viritati, di mia sti cosi davveru Vui pinzati?
Cuncetta- E Vui cumpari Cola, sinceramenti, sti cosi chi dicistu aviti ‘nmenti?
Cola- No cummaruzza bedda, jò mintia!
Cuncetta- E jò compari miu vi rispundia!
Cola- Ma allura Vui a mia mi pinzati e non è veru chi mi disprezzati!
Cuncetta- Certu chi non è veru babbasuni, jò sempri t'haiu pinzatu e ‘ccu raggiuni!
Cola- Ah! chi bestia c'haiu statu a non capiri chiddu chi l'ucchiuzzi toi vulivuni diri.
La gilusia chi m'accicò l'occhi e la menti mi fici sparrari di tia ‘nnuccentamenti!
Cuncetta- E puru jò cosi di tia ‘ndi dissi tanti, ma cridimi ne vulia diri veramenti.
A curpa è tò e di lu tò parrari chi ‘ddi cosi da bucca mi fici scappari!
Cola- Ma Cuncittuzza bedda ……u me parrari fù viritati, a differenza c'è na po' nigari!
Cuncetta- Chi differenza c'è? chi voi diri? spieghiti bonu e fammi capiri!
Cola- …..l'una cu ‘ll'autra non sunnu tanti pari! e si vidi un pocu puru ‘ntò caminari!
Cuncetta- Ah! brutta cosa tinta e………………
( a stu puntu l'omu ci tappa a bucca e dici…)
Zittiti pi favuri e non parrari
chi semu ‘npaci e non mi vogghiu sciarriari
chistu, Signuri mei, l'omu havi a fari
si cu li fimmini ‘npaci voli stari!
clicca qui per tornare all'indice delle commedie
|
