I PANCHINEDDI ALLATU O MONUMENTU

Si non fussi picchì di jonnu non c'è umbra

‘ddi panchineddi allatu o Monumentu

N'avissuru paci e nemmeno rizzettu.

A calata o friscu e finu a notti funda

Un cuntinuu rutuliari di cristiani:

‘llittirati dogni tipu, pinni e menzi pinni, manicula e menzi manicula,

babberi, falignami, nullafacenti, politicanti e sbriga facendi,

pinziunati, eredi di pinziunati, mantinuti e ciarlatani.

Di tuttu, c'è di tuttu!

GENTI PER BENE PUNTUALIZZU!!!!!!!

Esperti d'ogni cosa e canuscenza.

Supra i panchineddi allatu o Monumentu

sannu fattu:

Papi, Prisidenti, Guverni, Sindici e Assissuri,

sannu scrittu sintenzi di cundanna o assoluzioni,

sannu fattu e spasciatu allianzi nazionali,

sannu diciduti i sorti di Bersani, Berlusconi e Renzi,

Grillu, Alfanu, Letta e u poviru Cristu

sa spasciatu e rifattu u PD e u PDL,

esperti di pulitica, astronomia e urtaggi

esperti di machini, bricichetti e chirurgia

ma undi semu imbattibili è ‘ddà: ‘ntò palluni!!!!

Si ‘ccattunu e si vinduni giucaturi comu un nenti fussi!!

20 – 30 – 40 miluni e chi sunnu pi vinciri u campiunatu!!

‘Ndi ‘ccattamu a chistu e ‘ndi vindemu a chiddu

spostamu a chistu o centrucampu e chiddu all'ala,

chiddu chi ‘ccattastu è un broccu u nostru è un campiuni!!

Esperti di palluni e non sulu,

esperti e sapituri d'ogni cosa

e tutti bona gente chi è un piaciri scutari!

Chistu è un paisi du mundu si tuttu u mundu è un paisi

Ma jò non mu cangiria mancu cu paradisu!

Vogghiù ringraziari a ‘ccù ‘cci vinni l'idea di mettiri

I PANCHINEDDI ALLATU O MONUMENTU

In posizioni strategica ‘ntò menzu a chiazza

undi a calata o friscu c'è u vintacciolu i mari

e all'undici di sira ci scasa u tirrazzanu.

È grazii a stà leggera bolia chi i minchiati di oggi

fannu postu a chiddi di dumani!!

clicca qui per tornare all'indice delle poesie dialettali