A ME PATRI

Patruzzu miu jò ti vardu e ciangiu

la vita la passasti ‘ntà svintura

pinsandu a lu tò statu jò non mangiu

e vutu haiu fattu a la Madonna Nira.

Parrasti tantu e non ti mancava modu

a cunvinciri la genti ad accattari

lu mundu firriasti in ogni locu

a circari pani e la famigghia sistimari.

‘Ntà la terra scurdata di lu Cristu

dinaru e travagghiu tu circasti

li sacrifici e li stenti haiu vistu

quando li chindici di jnnaru tu rivasti.

Jò u ricordu ancora e l'haiu vivu

u chiantu chi facisti all'arrivu

e pedi da scalitta ti firmasti

e cu lacrimi all'occhi a terra tu baciasti.

U primu tò pinzeri mi fu caru

quandu u jornu appressu andasti a lu Tundaru,

di la purtuzza randi spalancata

‘nginocchiu arrivasti e pedi dill'Addulurata.

Ora patruzzu miu tantu tempu è passatu

e tantu tempu in lacrimi pi ‘ttia haiu statu

ma lu me chiantu ‘ncori non trova pari

quandu ti parru e tu non po' parrari.

Jò mi ricordu ancora e canzunedda

chi mi ‘nzignasti a casa ‘ntà vinedda

jò a cantu sempri e mai ma scordu

e a scrivu ‘ntà sti fogghi pi ricordu:

“Sacciu na canzunedda di pueta

e a cantu quandu è china la pignata

quandu è vacanti ‘cci tiru na petra

u mastru chi fici chidda ‘ndi fa notra”.

clicca qui per tornare all'indice delle poesie dialettali