SARVIZZA

Rispiru affaticatu e cori stancu

trimulizzu ‘ntà li mani e ‘ntà lu corpu

ciatu chi non nesci mancu a ‘nbutti

e cori avvilinatu senza sangu.

Chistu ‘ntà sti mumenti jò mi sentu

e giru pi li stanzi quasi a stentu,

penzu la vita e la morti ‘ntò ‘mmumentu

penzu chi non vidu la gioia di stu tempu.

Mentri mi disperu e penzu a vita

mi passa allatu na manuzza amica,

mi batti supra a spadda e mi vucia

jetta sti pinzeri chi veni l'allegria.

M'accumpagnu arredi a idda a passu stancu

e ringraziu lu Signuri pi stu Santu,

a sò vuciuzza fu pi ‘mmia un cantu

chi m'asciugò l'occhi chini di chiantu.

clicca qui per tornare all'indice delle poesie dialettali