CHI CAMURRIA

 

“Cu ll'anni si ‘ndi vannu li biddizzi”

dicia a bonarmuzza Santa di me mamma

e non c'è cosa ‘cchiù certa viritati

e a staiu spirimintandu ‘ntà stà vita,

jò mi ‘ndi rendu cuntu e sugnu canuscenti

chi li me estati passaru di longu tempu,

a biddizza si sciogghi comu a nivi o suli

quandu passunu l'anni e cuminciunu i pinzeri

ma pensu a tutti chiddi chi ‘ndi fannu mustra

di biddizzi d'un tempu ormai passatu

e fannu di tuttu pi nigari l'evidenza

cunfundendu la spiranza ca sustanza.

Supra a stà terra nuddu vivi a longu

e i segni da vicchiaia sunnu evidenti

rughi, capiddi janchi e peddi cadenti

fannu dill'essiri umanu na custanti

e non è virgogna mustrari l'anni chi passaru

pirchì ti ‘nzignaru u mali di stu mundu,

ti ‘nzignaru chi nenti ti veni rigalatu

e nuddu si porta supra u jmbu i tò pinzeri,

ma ti ‘nzignaru puru a stari o mundu

facendu di tò sbagghi ‘nzignamentu

e futtitinni si cu ll'anni sinni vannu li biddizzi

picchì a biddizza ‘cchiù randi è d'intra o cori.

 

Tanino Materia

 

 

 

 

clicca qui per ritornare all'indice della raccolta Emozioni